Saturday, July 15, 2006

നിങ്ങള്‍ ആരാ ഹേ എന്റെ വാലില്‍ പിടിക്കാന്‍?!!

വേതാ‍ളം തലകീഴാ‍യി കിടക്കുന്നപോലെ കിടന്നു തലകറങ്ങി വീണ്ടും ബോധം കെടുമെന്നാ‍യപ്പോള്‍ ക്ഷമ നശിച്ചു ഞാന്‍ ചോദിച്ചു “ മ്യാവൂ...നിങ്ങള്‍ ആരാ ഹേ എന്റെ വാലില്‍ പിടിക്കാന്‍?!!“
ഉത്തരം ഇല്ല. ചോദ്യം ആവര്‍ത്തിച്ചു. പഴയ സ്ഥിതി തന്നെ. മറുപടി ഇല്ല. എന്റെ പൂച്ചക്കടകന്‍ (പതിനെട്ടാമത്തെ അടവ്) പ്രയോഗിക്കാന്‍ തന്നെ തീരുമാനിച്ചു. തലകീഴായി കിടക്കുന്ന ഞാന്‍ പണിപെട്ട് കാലന്‍ കുടയുടെ പിടി പോലെയിരിക്കുന്ന "J" പോലെ വളഞ്ഞ് എന്റെ വാലില്‍ പിടിച്ചിരിക്കുന്ന ആ‍ളിന്റെ കൈയ്യില്‍ ഒരു മാന്ത് കൊടുക്കാന്‍ നോക്കി. ശക്തിയായിട്ട് കാറ്റിലൂടെ ഒന്ന് ആടി ഉലഞ്ഞു എന്നല്ലാതെ വാലിലെ മര്‍ദ്ദം മാറിയിട്ടില്ല!

വിഷമം സഹിക്കാതെ ഞാന്‍ വീണ്ടും കരഞ്ഞു. “ഞാനൊരു നിരുപദ്രവകാരിയാണേയ്, എന്റെ വാലേന്ന് പിടി വിട്ടില്ലേല്‍ ഞാന്‍ ചത്തുപോകുമേ.. പിടി വിടണേ.......”ഇത്തവണ എന്റെ അപേക്ഷ കേള്‍ക്കാതിരിക്കാന്‍ ആകാഞ്ഞിട്ടേന്നോണം ആ മനുഷ്യന്‍ നിന്ന നില്‍പ്പില്‍ എന്റെ വാലിലെ പിടി വിട്ടു!

പ്‌ധും!

മ്യോ.....ന്നും പറഞ്ഞു ഞാന്‍ താഴെ മൂക്ക് കുത്താതെ നാലു കാലില്‍ തന്നെ വീണു.. (നിങ്ങള്‍ മനുഷ്യന്മാര്‍ നാലുകാലില്‍ വീഴുമ്പോളും നാലു കാലില്‍ ആകുമ്പോഴും (?!) അതു പല പല പ്രശ്നങ്ങള്‍ക്കും വഴിവയ്ക്കാറുണ്ടെന്ന് ഞാന്‍ “പൂച്ച കൌമുദിയിലും”, “മലയാള പൂച്ചരമയിലും“, “പൂച്ചഭൂമിയിലും“ ഒക്കെ വായിച്ചിട്ടുണ്ട്. പുയ്യോ കഷ്ടം (അയ്യോ കഷ്ടം). നാലു കാലില്‍ നിന്ന് സ്വബോധത്തോടുകൂടി എന്തെങ്കിലും ചെയ്യാന്‍ നിങ്ങള്‍ക്കു കഴിയാത്തതില്‍ ഞങ്ങള്‍ പൂച്ചകള്‍ ഖേദിക്കുന്നു. ഞെട്ടെണ്ട. ഞങ്ങള്‍ പൂച്ചകള്‍ക്കുമുണ്ട് നിങ്ങളുടേതുപോലെയുള്ള സകല പ്രസ്ഥാനങ്ങളും. ഇന്നത്തേ യംഗ് ജനറേഷന്‍ പൂച്ചകളുടെ പുരോഗതിയെക്കുറിച്ച് വല്ലതും നിങ്ങള്‍ അറിയുന്നുണ്ടോ?അതവിടെ നില്‍ക്കട്ടെ.

താഴെ കാലുകുത്തിയപ്പം എന്തൊരു ആശ്വാസം! ഹൊ! മ്യാവൂ! നേരെ നടക്കുമ്പോ ആരെങ്കിലും ഓര്‍ക്കുന്നോ, അറിയുന്നോ തലകുത്തിയാലുള്ള ബുദ്ധിമുട്ടുകള്‍? നരിച്ചീര്‍ ചേട്ടന്‍ ഒരു സംഭവം തന്നേ!

കിട്ടിയ ലാക്ക് നോക്കി ജീവനുംകൊണ്ട് രക്ഷപ്പെടാനാ തോന്നിയത്. ഓടാന്‍ ഉള്ള എന്റെ ഭാവം കണ്ടിട്ടാകും പെട്ടെന്നൊരു ശബ്ദം. എന്നെ വാലില്‍ തൂക്കിയ ആള്‍ പറഞ്ഞു ... “ ഭയപ്പെടേണ്ട കുഞ്ഞേ! നിന്നെ ഞാന്‍ ദ്രോഹിക്കാന്‍ വന്നതല്ല. നിനക്ക് സുഖമാണല്ലോന്ന് ഉറപ്പുവരുത്താന്‍ വന്നു എന്നേയുള്ളു. നീ ഇവിടെ ബോധം കെട്ടു കിടന്നപ്പോള്‍ നോം ദിവ്യ ദൃഷ്ടിയിലൂടെ അതു കണ്ടു. നീ ബ്ലോഗില്‍ കയറി “പൊന്നുരുക്കാന്‍“ തുടങ്ങിയ വിവരവും നോം അറിയുന്നു! നീ പറയാതെയോ ചോദിക്കാതെയോ തന്നെ നിന്റെ സകല പ്രശ്നങ്ങളും നോം അറിയുന്നു. പരിഹരിച്ചിരിക്കുന്നു!!!“

“പ്രശ്നമോ? എന്റെ പ്രശ്നം ഇയ്യാളെങ്ങനെ അറിഞ്ഞു? മ്യാവൂ...“ ഞാന്‍ ചിന്തിച്ചു. “സംഗതി കൊള്ളാമല്ലോ പൂച്ചയോണ്‍! പിന്നസന്റ് പൂച്ച അവതരിപ്പിക്കുന്ന ഒരു പരസ്യത്തിലെ വാചകം ഓര്‍ത്തുപോയി!!! എന്റെ പ്രശ്നങ്ങള്‍ അറിയാനും പരിഹരിക്കാനും ഇതാരാ എന്റെ പൂച്ചതൊട്ടപ്പനോ? (നിങ്ങള്‍ അതിനെ അഞ്ഞൂറാനെന്നോ ഗോഡ്‌ഫാദറെന്നോ, തലതൊട്ടപ്പനെന്നോ ഒക്കെ പറഞ്ഞേക്കും). ദിവ്യദൃഷ്ടിയോ! അതെന്താ എന്റെ പൂച്ചക്കോടമ്മച്ചീ? അങ്ങനെ ഒരു പൂച്ച നടിയെക്കുറിച്ച് ഞാന്‍ കേട്ടിട്ടില്ലല്ലോ ഇതുവരെ? ! ഇനി ബാലപൂച്ചതാരമാണോ? ആ‍കും!“

ഞാനേതായാലും മിണ്ടാതിരിക്കുന്നത് ശരിയല്ല. നാലുകാലില്‍ നിന്നു ധൈര്യം സംഭരിച്ച് ചോദിച്ചു, “ മ്യാ‍ാ‍ാ‍ാവൂ‍ൂ... നിങ്ങള്‍ എന്റെ ആരുവ്വാ‍ാ‍ാ‍ാ, ന്ന് പുടികിട്ടുന്നില്ല. സത്യമായും ഓര്‍ക്കുന്നില്ല.

എന്റെ മാര്‍ജ്ജാരമൊഴി കേട്ട് അദ്ദേഹം പൂച്ചചിരിച്ചു (പുഞ്ചിരിച്ചു). അദ്ദേഹം പറഞ്ഞു, “കുഞ്ഞേ, നിനക്ക് എന്നെ അറിയാന്‍ വഴിയില്ല. നിന്റെ വല്യ വല്യ അപ്പൂപ്പന്‍ പൂച്ചയ്ക്കും അറിയുമോന്ന് തോന്നുന്നില്ല. നീ ഒരു 500 വര്‍ഷങ്ങള്‍ പിന്നിലേക്ക് പോയാലേ അത് മനസ്സിലാകു. അതായത് ബിഫോര്‍ ക്യാറ്റ് (B.C) എത്രാം വര്‍ഷം എന്ന് നീ തന്നെ കണക്കു കൂട്ടിയെടുത്തോ!“

അദ്ദേഹം തുടര്‍ന്നു,“ ഞാന്‍ നിനക്ക് നല്ലതേ വരുത്തൂ. നിന്റെ വല്യപൂച്ചച്ചന്മാരുമായിട്ട് എനിക്കുണ്ടായിരുന്ന സൌഹൃദത്തിന്റെ കഥയൊക്കെ ഇനി എപ്പോഴെങ്കിലും നിനക്ക് അറിയണമെന്ന് തോന്നുമ്പോള്‍ ഞാന്‍ പറഞ്ഞു തരാം. എന്താ മതിയോ?”

“മ്യാവൂ... ശരി, സമ്മതം.“ ഞാ‍ന്‍ മൊഴിഞ്ഞു.

അദ്ദേഹം പറഞ്ഞു. “നിന്റെ ഇപ്പോഴത്തെ പ്രശ്നങ്ങള്‍ ഞാന്‍ പരിഹരിച്ചിരിക്കുന്നു... നിനക്ക് മംഗളം” ഇത്രയും പറഞ്ഞ് ആ ദിവ്യന്‍ മറഞ്ഞു.(മംഗളം എന്ന് അദ്ദേഹം ഉദ്ദേശിച്ചത് വാ‍രികയല്ല. മംഗളം, മരംകൊത്തി, തുടങ്ങിയ നിങ്ങളുടെ പ്രസിദ്ധീകരണങ്ങള്‍ എനിക്ക് ദഹിക്കാറില്ല. പകരം ഞാന്‍ മാര്‍ജ്ജാരരത്നം, മാര്‍ജ്ജാര മാസിക, പൂച്ചരമ, പൂച്ചക്കുടുക്ക, ദി പൂച്ച റ്റുഡേ മുതലായവ ഇഷ്ടപ്പെടുന്നു)

ഞാന്‍ പോണ്ടര്‍ (ponder) അടിച്ചിരുന്നു പോയി! പൂച്ചകള്‍ അതിശയിക്കുമ്പോള്‍ അതിനു പോണ്ടര്‍ അടിക്കുക എന്ന് പറയും! english cat, I was pondering!

പ്രശ്നം പരിഹരിച്ചോ? എപ്പോ? മ്യാഹാ... എന്നാല്‍ ഞാനൊന്ന് നോക്കട്ടെ! ഓടി ചാടി ഞാന്‍ എന്റെ “ക്യാറ്റ് ടോപ്പില്‍“ നോക്കി!

ഞാന്‍ എന്റെ പൂച്ചബ്ലോഗ് തുറന്നു.....

കണ്ട കാഴ്ച്ച എന്നെ വീണ്ടും പോണ്ടര്‍ അടിപ്പിച്ചുകളഞ്ഞു. ഞാനെന്റെ പൂച്ചക്കണ്ണിലൂടെ ഇതാണ് കണ്ടത്.

“പ്രിയപ്പെട്ട വന്‍പുലികളെ!

നിങ്ങളുടെ ബൂലോഗത്തേക്ക് എന്റെ കൊച്ചുപൂച്ചയെ സ്വാഗതം ചെയ്തതിനും, അതിനെ “38 പൊന്നുകമന്റ്സ്“ കൊണ്ട് മൂടി, പൂച്ച ബോധം കെടുത്തിയതിനും, അവസാനം ആ ബോധക്കേടില്‍ നിന്നും അതിനെ ഉണര്‍ത്താന്‍ എനിക്ക് പ്രത്യക്ഷപ്പെടേണ്ടിവന്നു എങ്കിലും, കൊച്ചുകുറിഞ്ഞിക്ക് വേണ്ടി ഞാന്‍ ഹൃദയം നിറഞ്ഞ നന്ദി രേഖപ്പെടുത്തുന്നു. അതുണര്‍ന്നുനോക്കുമ്പോള്‍ ഇത് കാ‍ണും. കുറിഞ്ഞി അതിന്റെ ക്യാറ്റ്ടോപ്പില്‍ നിങ്ങളുടെ പ്രതികരണങ്ങള്‍ കണ്ട് തലകറങ്ങി വീണു. ബാക്കിയൊക്കെ നിങ്ങള്‍ക്കറിയാം!

ഏതായാ‍ലും അവളുടെ പൂച്ചമനസ്സ് പറയുന്നു അവള്‍ക്കറിയാവുന്ന തരത്തിലൊക്കെ “മ്യാവൂ... നന്ദി!“ , “മണി കിലുക്കി ഞാന്‍ പൂച്ചചന്തത്തോടെ ഞാന്‍ പതുക്കെ നടന്നു വരാം“, “പുലിത്തോല്‍ ഇല്ലാത്ത വെറും സാധാ‍ പൂ‍ച്ചത്തോല്‍ മാത്രമുള്ള കൊച്ചു കുറിഞ്ഞിയാണേ ഞാന്‍, മ്യാവൂ...” “പൂ‍ച്ചൊന്നും ഇല്ലാത്ത കുറിഞ്ഞിക്ക് ആര്‍ച്ചപൂച്ചയോ പുലിയോ ഒന്നും ആകണ്ടായേ.. മ്യാവൂ...” “കൊച്ചുകുറിഞ്ഞിയായിട്ട് തന്നെ ഇരുന്നാല്‍ മതിയേ..മ്യാവൂ...”

ഒരിക്കല്‍ കൂടി എല്ലാ പുലി ആങ്ങളമാര്‍ക്കും പുലിപെങ്ങേന്മാര്‍ക്കും, പുലി സഹോദരങ്ങള്‍ക്കും ബൂലോഗപുലിലോകത്തെ എല്ലാ മലയാളിപുലികള്‍ക്കും കുറിഞ്ഞി പറയുന്നു, “തെരിമാ കശിഹ് ബന്യാക്ക്” അധവാ, thanks a million, അധവാ ആയിരം നന്ദി!

....... for Kurinji the Cat, by Kurinji's Swamy.

...... ഒരു മെഗാ പൂച്ചക്കഥ തുടങ്ങാനുള്ള സ്കോപ്പ് ഉണ്ടല്ലോ...! മ്യാ‍ാ‍ാ‍ാ‍ാവൂ‍ൂ‍ൂ.. ഞാന്‍ വീണ്ടും പോണ്ടര്‍ അടിച്ചു!!!!!

Thursday, July 13, 2006

ഇതിന്റെ കാരണം ആരാന്നറിയാമോ?

ഓം ഹ്രീം മാ‍ര്‍ജ്ജാരസ്യ നമ: ഓം ഹം ഹ്രീ‍ീ‍ീ‍ീ‍ീം ക്രാം ക്രീം ക്രൂം ക്രൂ‍ൂ‍ൂ‍ൂ‍ൂ‍ൂ...

ണിം ണിം ണിം ....
മണിയൊച്ച കാതു തുളച്ചു കയറി.

ചെവിക്കല്ല് പൊട്ടുമാറ് ഒച്ച കേട്ടു ഞാന്‍ ഞെട്ടി ഉണര്‍ന്നു! മ്യാവൂ...
പൂച്ചപ്പൂട മുഴുവന്‍ നനഞ്ഞിരിക്കുന്നു. മേലു മുഴുവനും തണുത്ത വെള്ളം ആരോ കുടഞ്ഞു! വെള്ളത്തില്‍വീണ പൂച്ചയുടെ അവസ്ഥ എനിക്കല്ലേ അറീയൂ? മ്യാവൂ... തണുക്കുന്നേ

മ്മ്മ്മ്യവൂ‍ൂ‍ൂ‍ൂ‍ൂമ്യാവൂ‍ൂ‍ൂ‍ൂ‍ൂ.. കണ്ണു തുറന്നപ്പോള്‍ അലറി വിളിച്ചുപോയി!
ഭൂമി കുലുങ്ങിയോ....? അതോ ഇനി തലകറങ്ങിയോ...? ഒരു പിടിയും കിട്ടുന്നില്ല! എന്റെ പൂച്ച ഓര്‍മ്മ അങ്ങനെ തെളിഞ്ഞു തുടങ്ങി. ചുറ്റും നോക്കിയപ്പോള്‍ ആകെ ഒരു വശപ്പെശക്! ഇതെന്നാ, വിളക്കുകളും (ലൈറ്റേ!) കാറ്റു തരുന്ന യന്ത്രവും (ഫ്യാന്‍) ഒക്കെ താഴെ വന്നത്?!ഒന്നു ഞെളിപിരി കൊണ്ടുനോക്കി. രക്ഷയില്ല!

മിയോവൂഡാ (അയ്യോടാ!) ഞാന്‍ പൂച്ചകള്‍ നില്‍ക്കുന്നതുപോലെയല്ലല്ലോ നില്‍ക്കുന്നത്! “ക്യാറ്റ്“ മാറി “ബാറ്റ്” പൊസിഷനില്‍ ആണെന്നു മനസ്സിലായി. അതായത് എന്റെ സുഹൃത്ത് ഞരിച്ചീറ് ചേട്ടന്‍ (ചിലര്‍ പുള്ളിയെ പാരന്‍ എന്നും വവ്വാല്‍ എന്നും ഒക്കെ വിളിക്കും) എപ്പോഴും കിടക്കാറുള്ള പോലെ ഞാനും നില്‍ക്കുന്നു.... തലയും കുത്തി! വാല് മേലിലും തല താഴെയും.

എന്റെ പൂച്ചക്കോട് ഭഗവതി!!! ഇനി ഞാനും വവ്വാല്‍ ആയോ? പൂച്ചേശ്വരന്മാരേ, ഇന്നലെ വരെ ഇങ്ങനെ ആയിരുന്നില്ലല്ലോ! എന്റെ ജീവിതം വവ്വാവാല്‍ ആയോ?

ഇല്ല! ഹേയ്, അങ്ങനാകാന്‍ വഴിയില്ല! പക്ഷേ, പരിസര വീക്ഷണം നടത്താ‍ന്‍ തല നേരെ നിന്നല്ലേ പറ്റു! എങ്കിലും കണ്ണ് തുറന്നു ഞാന്‍ ഒന്നുകൂടി നോക്കി. ഇപ്പം എല്ലാം പൊക (ക്ഷമിക്കണം ഞാനൊരു നോണ്‍-സ്‌മോക്കിംഗ് ക്യാറ്റ് ആണ്. ജഗതി പറയുന്നതുപോലെ "ബ്ലീസ് ഡോണ്ട് മിസണ്ടര്‍സ്റ്റാന്‍ഡ് മീ" ) പോലെ ചെറുതായി തെളിഞ്ഞു തുടങ്ങി. എങ്ങനെ വീണാലും നാലുകാലില്‍ തന്നെ നില്‍ക്കാന്‍ ഞങ്ങള്‍ പൂച്ചകള്‍ക്ക് ഒരു പ്രത്യേക കഴിവുണ്ടെന്ന് നിങ്ങള്‍ മനുഷ്യര്‍ പറഞ്ഞുകേള്‍ക്കാറുണ്ട്. ആ എനിക്ക് ഈ ഗതി വന്നോ?

ഇല്ല. ഞാന്‍ വവ്വാല്‍ ആയതല്ല. എന്നെ ആരോ തലകീഴായി തൂക്കി പിടിച്ചിരിക്കുകയാണ്.

ഇതാരാ പൂച്ചയപ്പനേ എന്റെ അടുത്ത് നില്‍ക്കുന്നേ?

മ്യാവു....മ്മ്മ്മ്മ്മ്യാ‍ാ‍ാവൂ‍ൂ‍ൂ‍ൂ‍ൂ‍ൂ എന്നെ താഴെ നിര്‍ത്തണേ..... തല കറങ്ങുന്നേ..... രക്ഷിക്കണേ... എന്റെ കാലീന്ന് , ഛെ, വാലീന്ന് പിടിവിടൂ...... പ്ലീസ്.....!!!!

(പൂച്ചയുടെ വാലില്‍ പിടിച്ചിരിക്കുന്നത് ആര്? എന്തിന്? വാലീന്ന് പിടി വിടുമോ, ഇല്ലയോ?
അതറിയാന്‍ വായിക്കൂ ഈ സ്റ്റീരിയലിന്റെ അടുത്ത എപ്പിസോഡ് - “നിങ്ങളാരാ ഹേ വാലില്‍ പിടിക്കാന്‍” - ഇതേ ചാനലില്‍ ഉടന്‍ തന്നെ വരും...)

Wednesday, July 12, 2006

പൂച്ചയ്ക്കാരും മണി കെട്ടണ്ട

കാര്യം ഇല്ലാത്തിടത്ത് കയറി തലയിടുമ്പോള്‍ ചിലരോട് ചോദിക്കാറുണ്ട് “പൂച്ചയ്ക്കെന്താ പൊന്നുരുക്കുന്നിടത്ത് കാര്യം?” എന്ന്.

എന്നാല്‍, എന്തുകൊണ്ടാ അവിടെ പൂച്ച വന്നത്? പൂച്ചയ്ക്ക് പകരം വല്ല പുലിയോ പശുവോ ഒക്കെ ആയിക്കൂടേ?

ബൂലോഗം ഇപ്പോള്‍ പുലിലോഗമാണല്ലോ! വല്യ ബൂലോഗപ്പുലികളൊക്കെ ചോദിക്കും അതേത് പൂച്ച ബ്ലോഗറാണെന്ന്! എല്ലാ പുലികളും വലുതായ പൂച്ചകള്‍ അല്ലേ? അങ്ങനെയായിരുന്നല്ലോ once upon a life time!

ആഫ്റ്റര്‍ ഓള്‍, പുലിഗള്‍, സിം‌ഗങ്ങള്‍, കടുബകള്‍, ബൂലോഗത്തെ എല്ലാ “വമ്പന്‍ പുലിവര്യ്-വര്യി”കളെല്ലാം ബിലോംഗ്സ് റ്റു ദ കോമണ്‍ ഫാമിലി ഓര്‍ ദ ബുലോഗക്കുടുംബം.

സ്വാമിയുടെ പൂച്ചക്കുട്ടി ഇതാ ബൂലോഗത്ത വമ്പന്‍-വമ്പി പുലിക്കൂട്ടത്തിന്റെ ഇടയിലേക്ക് വരുന്നു......
മ്യാവൂ.... മ്യാവൂ....